Ruvu Shooting hiyoo Iringa

Meya wa Manispaa ya Iringa, Ibrahim Ngwada amewaomba wadau na mashabiki wa soka ndani na nje ya mkoa wa Iringa kuwa wavumilivu wakati mipango ikiendelea juu ya manunuzi ya timu ya Ruvu Shooting ya Championship.

Leo taarifa katika mitandao mbalimbali zilisambaa zikieleza Manispaa hiyo kukamilisha taratibu zote za manunuzi ya timu hiyo ya Maafande yenye makazi yake mkoani Pwani na kuelezwa kuwa itahamishiwa rasmi Iringa.

Ruvu Shooting ilishuka msimu uliopita na msimu ujao itashiriki Championship inayotarajia kuanza Septemba 2 mwaka huu, huku mapema ikielezwa kuwa sokoni kupigwa bei.

Ngwada ameliambia Mwanaspoti kuwa bado taarifa hazijawa rasmi licha ya mazungumzo kuendelea akisema kuwa baada ya kukamilisha taratibu zote wataweka wazi.

"Niwaombe wadau na mashabiki kuwa na uvumilivu kwenye hili wakati taratibu zikiendelea, tukikamilisha tutaweka wazi na nchi itafahamu" amesema Ngwada.

Iringa haijawa na timu Ligi Kuu kwa misimu minne sasa tangu waliposhuka daraja Lipuli na msimu ujao haijawa na uhakika wa kushuhudia michuano hiyo pamoja na championship baada ya 'Wanapaluhengo' hao kushindwa kupanda wakibaki First League.