Cristiano Ronaldo akijifua katika viwanja vya mazoezi vya Real Madrid
Cristiano Ronaldo nyota wa kimataifa wa Ureno amerudi Hispania akitokea Qatar ambapo ameweka kambi binafsi huko akitumia dimba la Valdebebas linalomilikiwa na Real Madrid kama sehemu ya kujiweka fiti.
Ronaldo ambaye kwa sasa hana klabu ya kuchezea baada ya kushindwana na Manchester United, ameamua kutumia uwanja huo siku chache baada ya taifa lake la Ureno kuondolewa na Morocco hatua ya robo fainali akiwa anasubiri Januari Mosi ambapo dirisha dogo litafunguliwa rasmi.
Mkataba wa Manchester United na Ronaldo ulivunjwa kufuatia Cristiano mchezaji wa zamani wa Juventus, Real Madrid na Sporting Lisbon, kufanya mahojiano ambayo yalikuwa yanaibeza klabu na kumtweza kocha Erik ten Hag.
Kwa sasa hana timu lakini inaelezwa kuwa ana ofa nyingi mezani, klabu ya Al-Nassr ya Saudi Arabia ni moja ya klabu zenye nia ya kumsajili Ronaldo mwenye umri wa miaka 37.
Pamoja na kutumia uwanja huo, hakuna uwezekano wa kusajiliwa tena na Real Madrid.