Robo fainali CAFCL, Yanga atampiga ASEC 'home' na 'away'

Shabiki kindakindaki wa Klabu ya Simba, Mchome Mapovu amesema kuwa iwapo klabu ya Yanga itapangwa kucheza na timu ya ASEC Mimosas kwenye robo fainali ya Ligi ya Mabingwa Afrika, basi njia ya Wananchi kwenda nusu fainali itakuwa nyeupe.

Yanga ni miongoni mwa timu nane ambazo zimefuzu kwenda robo fainali ya michuano hiyo msimu huu ikimaliza nafasi ya pili ambapo moja kati ya timu tatu (Mamelodi Sundowns, Petro de Luada na ASEC Mimosasa) atakutana nayo kwenye hatua hiyo mujibu wa kanuni za mashindano hayo.

“Hao walioongoza kwenye makundi yao wote ni wababe, hamna mchovu hata mmoja. Ukimwangalia Mamelodi ni mbabe, Al Ahly ndio hakutani nae tena, kwa hiyo kuna ASEC Mimosas na Petro de Luanda. ASEC ni mbabe ila sio kwa Yanga.

“Mimi nawaombea Wananchi wakutane na ASEC, wakikutana naye Yanga anatoboa nusu fainali. Ninaamini kabisa, Eng. Hersi Said ni mzee wa mipango anaweza kufanya mipango lolote likawezekana na Yanga akakutana na ASEC.

“Timu ambayo Yanga anaweza kupambana nayo na akachukua alama tatu nyumbani na ugenini ni ASEC Mimosas, hawa wengine ni kivumbi na jasho,” amesema mchome Mapovu.