Simba wakijifua Jijini Dar es Salaam
Kocha Mkuu wa Simba, Robert Oliveira 'Robertinho amesema licha ya wachezaji wake kujiandaa vyema lakini watakaba zaidi ili kuwazuia wapinzani wao.
Simba kesho itashuka katika uwanja wao wa nyumbani Benjamin Mkapa wakiwa na kumbukumbu ya kumfunga Vipers goli 1-0 nyumbani kwake Uganda.
Robertinho ameyasema hayo leo Machi 6 wakati akizungumza na waandishi wa habari jijini Dar es Salaam na kuongeza hakuna mchezaji majeruhi hata mmoja na hivyo ataingia na wachezaji muhimu.
Aidha ameeleza kuwa wanafahamu ya kwamba mechi itakuwa ngumu lakini kutokana walikuwa na muda wa kutosha kufanya maandalizi yao watapata alama 3 katika mchezo huo muhimu.
Pia ameongeza kuwa tangu wapate ushindi kwenye mechi na vipers wachezaji wanajiamini vya kutosha na kwamba Champions League sio mashindano rahisi yatahitaji muda.
"Tunaanza na wachezaji muhimu wengine kama hamtawaona basi watacheza mechi inayokuja sasa hivi wachezaji wamerudisha hali na morali hivyo tunaamini tutashinda". Alisema Robertinho
Hata hivyo kocha huyo Mbrazili alisisitiza kupewa muda zaidi ili aweze kupata matokeo kwasababu ya ugumu wa michuano hiyo.
Alisema kuhusiana na kutopata matokeo mazuri kwenye mechi zilizopita ni kutokana na ratiba kuingiliana na muda kuwa mchache.
Nyota wa kikosi hicho, Shomari Kapombe amesema wao kama wachezaji wamejiandaa kurudisha heshima kwa wanachama na mashabiki wao kama ilivyokuwa zamani.
Kapombe ameongeza wanajiamini na wanahitaji sapoti kubwa kutoka kwa mashabiki wao ili waweze kupata ushindi.
"Kwanza inabidi tutimize malengo ya klabu na ndio maana hata sisi tuliokaa simba muda mrefu wakija wachezaji wapya tunawakumbusha malengo ya klabu ni yapi," amesema Kapombe