Redondo naye kama Djuma Shaban tu

Staa wa zamani wa Simba, Azam FC, Ramadhan Chombo ‘Redondo’ ameungana na beki wa zamani wa Yanga, Djuma Shabani kukaa nje ya uwanja hadi dirisha dogo la usajili litakapofunguliwa Desemba, mwaka huu.

Msimu uliopita Chombo aliuanza akiwa na timu ya Geita Gold, lakini katika dirisha dogo alipelekwa Polisi Tanzania kwa mkopo na baada ya msimu kuisha mkataba wake ulimalizika.

Licha ya kuwapo kwa timu zilizomhitaji ikiwemo Namungo na Tanzania Prisons, Chombo alishindwa kusaini mkataba nazo hadi dirisha la usajili linafungwa na sasa ni mchezaji huru huku akitaja pesa kuwa sababu ya kutotua katika timu hizo.

“Ujue mpira ndio kazi yangu, kwa hiyo siwezi kukurupuka. Kuna timu zilihitaji huduma yangu na tukafanya mawasiliano, lakini sikusaini kutokana na kushindwana kwenye maslahi,” alisema Chombo na kuongeza:

“Hata hivyo, kuna timu tupo kwenye mazungumzo bora. Kwa sasa siwezi kuitaja lakini kila kitu kikienda sawa nitajiunga nayo na kufanya mazoezi huku nikisubiri dirisha la usajili lifunguliwe.”

Hali hiyo haipishani na beki Djuma Shabani aliyejiunga na Azam FC, lakini kwa sasa hayupo kwenye usajili wa matajiri hao wa Chamazi kutokana na idadi ya wachezaji wa kigeni 12 waliopo kikosini.

Nje ya Simba, Azam, Geita na Polisi, Chombo amewahi pia kuzichezea timu za African Lyon, Mbeya City, Biashara United na Taifa Stars kwa nyakati tofauti.