Raha za Namungo kuendelea leo

WAWAKILISHI wa Tanzania Kombe la Shirikisho Afrika Namungo FC wanatarajiwa kushuka kwenye Uwanja wa Azam Complex Chamazi, Dar es Salaam kweney mchezo wa marudiano dhidi ya Al Rabita ya Sudan Kusini, leo.

Al Rabita wanalazimika kucheza mchezo huo ugenini ili hali wakiwa wenyeji kutokana na machafuko yanayoendelea nchini kwao. Namungo inacheza ikiwa na faida ya ushindi katika mchezo wa kwanza uliochezwa wiki iliyopita ambao walishinda mabao 3-0 kwenye uwanja huo huo wakiwa wenyeji.

Bado inaendelea kuwa na faida ya kuwa na mashabiki na hali ya hewa waliyozoea lakini wanatakiwa wasibweteke bali kutafuta ushindi au kupata sare yoyote ili kusonga mbele.

Timu hiyo yenye makazi yake Lindi inashiriki michuano hiyo kwa mara ya kwanza inahitaji kuweka historia nzuri kwa kufuzu hatua ya kwanza kama itamtoa mpinzani wake. Namungo ina wachezaji wazuri ingawa ni wachache wenye uzoefu wa kimataifa na wengine wanaendelea kupata uzoefu kupitia mashindano hayo.

Timu hii wakati inaanza msimu huu haikuwa katika kiwango bora hali iliyolazimu kumtimua kocha wake Hitimana Thiery.

Tangu kocha mpya Hemed Morocco apewe mikoba ameonesha kitu kinachoweza kuisaidia timu hiyo baada ya mchezo wa kwanza wa ligi dhidi ya Yanga kuiwezesha Namungo kucheza mchezo wa ushindani na kutoka suluhu.

Pia mchezo uliopita walicheza vizuri na pengine kama wataendelea na kiwango kile basi watakuwa na nafasi ya kuvuka hatua hiyo.