Qatar kupokea wageni milioni 1.2

Qatar imeamuru wafanyakazi wengi wa serikali kufanyia kazi majumbani wakati wa mashindano ya Kombe la Dunia mwezi ujao.

Shule zitapunguziwa masaa kdhaa wiki mbili kabla ya kuanza kinyang'anyiro hicho na kisha kufungwa wakati nchi hiyo ikijiandaa kwa mmiminiko mkubwa wa wageni. Qatar ni nchi ya kwanza ya Mashariki ya Kati kuwa mwenyeji wa Kombe la Dunia litakalong'oa nanga Novemba 20 huku fainali ikipigwa Desemba 18.

Inatumai tamasha hilo litawavutia karibu wageni milioni 1.2, au karibu nusu ya idadi ya watu nchini humo, hivyo kusababisha changamoto kubwa ya ulinzi na usalama.

Kwa sababu hiyo, serikali imesema asilimia 80 ya nguvu kazi yake itafanyia kazi nyumbani kati ya Novemba mosi na Desemba 19.