Pete ya ndoa yamvuruga Klopp

Kocha Jurgen Klopp kijasho kimemtoka baada ya kupoteza pete yake ya ndoa kwenye nyasi za Uwanja wa Anfield baada ya kushangilia ushindi wa timu yake ya Liverpool dhidi ya Newcastle juzi Jumatatu.

Klopp alifurahia chama lake kushinda 4-2 na hivyo kuweka pengo la pointi tatu kileleni kwenye msimamo wa Ligi Kuu England, lakini mambo yalitibuka baada ya kugundua pete iliyokuwa kwenye kidole haipo.

Klopp alikatiza sherehe zote kuanza kuitafuta pete hiyo bila ya mafanikio hadi hapo mpiga picha wa uwanjani alipoinoa na kurudisha furaha ya kocha huyo Mjerumani.

Kocha huyo wa zamani wa Borussia Dortmund hakuona kitu kingine kinachofaa baada ya kuona pete yake zaidi ya kuibusu na kuonyesha tabasamu pana usoni.

Hata hivyo, hiyo si mara ya kwanza kwa Klopp kupoteza pete yake baada ya kukiri kufanya hivyo na kushukuru msamaria mwema mmoja aliyeona na kumrudishia.

Klopp alisema: “Niliwahi kuipoteza na hakika nilihitaji mpiga mbizi mahiri kwa sababu ilikuwa kwenye maji. Siku hadi siku nimekuwa nikipungua mwili, hivyo inakuwa rahisi kuvuka kidoleni!”

Wakati akimshukuru aliyemsaidia kupata pete yake safari hii ya pili, Klopp alisema: “Mimi si mtu wa mambo ya vipuri, lakini hii ni pete ambayo siwezi kuishi bila ya kuwa nayo. Yule mpigapicha ni shujaa wangu. Shujaa wangu wa mwaka 2024.”