Lucas Paqueta.
Chama cha soka cha England (FA) kinataka kiungo Lucas Paqueta afungiwe maisha kujihusisha na soka.
Kiungo huyo wa Kibrazili anayekipiga kwenye kikosi cha West Ham United, Paqueta anakabiliwa na mashtaka manne ya kuhusu kubeti baada ya kudaiwa kufanya makosa ya makusudi ili aonyeshwe kadi za njano kwenye mechi nne tofauti za Ligi Kuu England.
Paqueta alisisitiza kwamba hana hatia - lakini FA kwenye waraka wake wa mashtaka imependekeza mchezaji huyo afungiwe kucheza soka maisha yake yote endapo kama atakutwa na hatia.
Beki wa Stratford Town, Kynan Isaac alifungiwa miaka 10 ya kujihusisha na soka baada ya kudaiwa kubeti ili aonyeshwe kadi ya njano kwenye mechi ya Kombe la FA mwaka 2021.
Wakati mchezaji wa Lincoln City, beki Bradley Wood naye alifungiwa miaka sita baada ya kufanya kosa la makusudi ili aonyeshwe kadi ya njano kwenye matukio mawili yaliyotokea kwenye mechi za Kombe la FA miaka mitatu kabla.
Hata hivyo, waendeesha mashtaka wa FA wanataka Paqueta, 26, apewe adhabu kali kwa sababu kesi yake ni siriazi zaidi.
Kinachoelezwa ni kwamba tukio ambalo limemhusisha Mbrazili huyo kila beti ilikuwa na thamani ya chini ya Pauni 7.
Paqueta ameshuhutumiwa kufanya matukio ya makusudi ili aonyeshwe kadi ya njano kwenye mechi nne tofauti za Ligi Kuu England - dhidi ya Leicester City mwaka 2022, Aston Villa, Leeds United na Bournemouth, zote mwaka 2023 - ili kuwafanya marafiki zake kupiga pesa.
Inaelezwa kwamba watu 60 walibeti kuhusu Paqueta kuonyeshwa kadi ya njano kwenye mechi moja au zote nne, ambapo thamani ya kila beti ilikuwa inaanzia Pauni 7 hadi Pauni 400, ambapo mshindi alikuwa anashinda hadi Pauni 100,000.
Sakata hilo linadaiwa kutibua mpango wa kiungo huyo kwenda kujiunga na Manchester City kwa ada ya Pauni 80 milioni akiwa amemvutia kocha Pep Guardiola.