Pamba mzuka umerudi, yaichapa Mashujaa 2-0

PAMBA imeibuka na ushindi wa mabao 2-0 dhidi ya Mashujaa FC ya Kigoma katika mchezo wa raundi ya 24 Ligi ya Championship.

Ushindi huo ni kama umerejesha mzuka katika kikosi cha Pamba baada ya mchezo uliopita kukwama nyumbani ikibanwa mbavu na Kitayosce ya Tabora na kuambulia suluhu (0-0).

Pamba imepata ushindi huo leo mchezo huo ukipigwa Uwanja wa Nyamagana kuanzia saa 8 mchana na kuifanya kucheza michezo tisa mfululizo ya ligi hiyo bila kupoteza ikishinda saba na sare mbili.

Licha ya kutengeneza nafasi nyingi katika kipindi cha kwanza, Pamba imekosa utulivu kwenye umaliziaji na kujikuta ikienda mapumziko bila kufungana.

Ambapo, kipindi cha pili Pamba imekuja tofauti ikipata mabao mawili ya haraka kupitia kwa Mashaka Hamis na James Ambrose ambayo yameihakikishia ushindi leo.

Ushindi huo unaipeleka Pamba katika nafasi ya pili mbele ya Kitayosce, ambapo imefikisha pointi 51 huku Kitayosce ikiwa na 50 wakati JKT Tanzania iko kileleni na pointi 58.

Baada ya kupoteza leo kwa mabao 2-0, Mashujaa imeendeleza uteja mbele ya Pamba ambapo katika mchezo wa kwanza uliopigwa mkoani Kigoma ilikubali pia kichapo cha mabao 2-0.

Pamba imebakiza michezo minne kuhitimisha ligi na kujua hatma yao kama msimu huu watavunja mwiko wa kutopanda daraja kwa zaidi ya miaka 20. Michezo hiyo minne ni dhidi ya JKT Tanzania, Fountain Gate, Mbuni na African Sports.