Nunez azua hofu Liverpool

Liverpool imepata pigo jingine baada ya straika wake, Darwin Nunez kujiondoa kwenye kikosi cha timu ya taifa ya Uruguay baada ya kudaiwa anasumbuliwa na maumivu ya misuli ya paja.

Kinachoelezwa ni straika Nunez alipata maumivu hayo kwenye mechi ya kichapo cha mabao 4-3 kutoka kwa Manchester United kwenye robo fainali ya Kombe la FA, Jumapili iliyopita.

Kwenye mchezo huo, Nunez, 24, alicheza kwa dakika zote 120 wakati Liverpool ilipopambana na mahasimu wao Man United uwanjani Old Trafford.

Straika huyo aliripotiwa kulalamika kwa kocha wa Uruguay, Marcelo Bielsa hajisikii vyema, anasumbuliwa na maumivu ya misuli na hivyo ameambiwa abaki na madaktari wa klabu yake apatiwe tiba.

Kwa maana hiyo, staa huyo hatakuwamo kwenye kikosi cha La Celeste kitakachocheza mechi zijazo za kirafiki, ikiwamo ile ya kuwakabili Ivory Coast.

Hata hivyo, majeraha hayo hayaonekani kuwa ni siriazi sana, kwa sababu Liverpool itasubiri kwa karibu wiki mbili kucheza mechi nyingine na watakipiga na Brighton, Machi 31, uwanjani Anfield.

Kikosi cha Liverpool kimekuwa kikiandamwa na majeruhi wengi kwa siku za karibuni, ambapo mastaa kama Luis Diaz, Cody Gakpo, Joel Matip, Trent Alexander-Arnold, Curtis Jones, Diogo Jota, Thiago Alcantara, Stefan Bajcetic na Ben Doak, wote wameripotiwa kuwa majeruhi mbalimbali.