Nikiwa mkabaji nisingependa kukutana na Maxi Nzengeli - Ambangile

Mchambuzi wa masuala ya soka kutoka Wasafi FM, George Ambangile amesema kuwa angekuwa kiungo mkabaji asingependa kukutana na kiungo wa Yanga, Maxi Mpiah Nzengeli kwani uchezaji wake hautabiriki na anasumbua.

Ambangile amesema hayo kupitia kipindi cha Sports Arena wakati akizungumzia mchezo wa Simba dhidi ya Yanga ambapo Wananchi waliibuka na ushindi mnono wa bao 5-1 huku Maxi akifunga mabao mawili peke yake katika mchezo huo.

“Watu wanaweza kumsifia sana Pacome na nimeona hata uchezaji bora wa mechi ya jana amepewa yeye lakini ukweli ni kwamba injini ya Yanga jana alikuwa ni Maxi.

“Maxi ni mchezaji asiyetulia na alikuwepo kila sehemu, ukiwa Kiungo mkabaji ni ngumu kumdhibiti Maxi kuliko Pacome, hata mimi nikiwa kiungo mkabaji nisingetamani kukutana nae,” amesema George Ambangile on Sports Arena.