Nani amuombe mwenzie radhi kati ya Dembele na Barcelona?

Agosti 12 mwaka 2023 wakati anatoa mkono wake wa kwa kheri nchini Hispania Ousman Dembele aliambiwa kwa kejeli na mashabiki wa FC Barcelona kwamba hapaswi kuwaaga wao kwa kuwa hawawezi kumkumbuka ila madaktari na ambulance zilizopo Barcelona ndivyo vitu pekee vitakavyomkumbuka.

Haukuwa mwanzo wa mkasa wa fundi wa mpira aliyegeuka adui Catalunya, ulikuwa muendelezo wa kisa cha ndugu lawama kilichoanzia kule Uingereza usiku mmoja wa may 2019 ambapo FC Barcelona ilifanya kosa la kutogusa bango la 'This is Anfield' mlango wa kuingilia kutoka vyumba vya kubadilishia nguo mjini Merseyside, nani hakumuona Dembele wa siku ile?!

Inaaminika yeye ndio chanzo cha meza kupinduka usiku ule wa kusahaulika kwa mashabiki wa Fc Barcelona mbele ya Liverpool, inasemekana yeye ndio zimwi liloondoka na Barca robo fainali msimu huu likifanya linavyojisikia mechi zote mbili ndani ya uzi wa PSG na kutuachia swali moja gumu.....

Nani anapaswa kuombwa radhi kati ya mashabiki wa Fc Barcelona na Ousmane Dembele kwenye matukio hayo?!!