Namungo bado ipo mawindoni

Kocha wa Namungo, Denis Kitambi amesema kwenye dirisha hili la usajili wamebakiza maeneo matatu ili kumaliza usajili wao.

Hadi sasa, Namungo imemtambulisha Erasto Nyoni anayemudu kucheza nafasi zaidi ya moja kwenye kikosi chao, hivyo bado nafasi tatu.

Akizungumza na Mwanaspoti, jana, Kitambi alisema katika dirisha hili wanapanga kusajili wachezaji wanne ili kuingia kwenye kikosi chao kwa ajili ya msimu ujao na kuendelea walipoishia.

"Baada ya Nyoni tumebakiza nafasi tatu, wengine watakuwa kwenye eneo la viungo washambuliaji (winga na kiungo mshambuliaji). Eneo lingine ambalo tutasajili ni upande wa mshambuliaji, tutaangalia mgeni au mzawa," alisema Kitambi.

Akizungumzia upande wa maandalizi kwa ajili ya msimu ujao, Kitambi, kocha wa zamani wa Azam FC, alisema tayari yameshaanza kwa hapa Dar es Salaam ili kuwaweka tayari wachezaji.

"Tumeanza kambi tangu juzi (Jumanne) hapa hapa Dar na mazoezi yanaendelea," alisema kocha huyo.

Msimu uliopita, Kitambi aliiongoza Namungo kumaliza katika nafasi ya tano kwenye msimamo wa Ligi Kuu.