Nabi aiandaa Yanga SC kuiangamiza Namungo

Akizungumza na gazeti hili jijini Dar es Salaam jana, kocha huyo alisema wanaendelea na maandalizi kwa ajili ya mechi yao ijayo, ugenini dhidi ya Namungo FC ambayo anahitaji kupata matokeo chanya.

Alisema maandalizi yanaendelea vizuri na ana matumaini utakuwa mchezo wa ushindani mkubwa kutokana na pande zote mbili kuhitaji kupata matokeo.

"Maandalizi yanaendelea vizuri, tunajiandaa kwa ajili ya michezo yetu yote ikiwamo dhidi ya Namungo FC, tunafanyia kazi upungufu wetu hususan kujiimarisha kwenye safu ya ushambuliaji na viungo ili kwenda kutafuta matokeo chanya kwenye mchezo huo," alisema Nabi.

Naye kiungo wa Yanga, Haruna Niyonzima, alisema wamejiandaa vizuri kukabiliana na Namungo FC na utakuwa mchezo wa ushindani kwa sababu kila pande unahitaji matokeo mazuri.

"Suala la ubingwa kama nilivyosema awali kwamba, bado hatujaondoka katika mipango hiyo kwa sababu lolote linaweza kutokea kwa waliokuwa juu yetu kupoteza mechi na kukosa pointi na sisi tukafanya vizuri," alisema Niyonzima.

Yanga inayoshika nafasi ya pili kwenye msimamo wa Ligi Kuu ikiwa na pointi 57 zilizotokana na mechi 27, Jumamosi katika Uwanja wa Majaliwa, Ruangwa mkoani Lindi, itakuwa na kibarua kigumu dhidi ya Namungo FC iliyopo nafasi ya 11 na alama zake 32 baada ya kushuka dimbani mara 24.