Nabi afichua siri ya kumuanzisha Makambo

Kocha Mkuu wa Young Africans Nasreddine Mohamed Nabi ametoa siri ya kumuanzisha Mshambuliaji Heritier Makambo kwenye kikosi chake cha kwanza kilichoibuka na ushindi wa 1-0 dhidi ya Geita Gold FC.

Young Africans ilicheza ugenini Jumamosi (Oktoba 29) katika Uwanja CCM Kirumba jijini Mwanza, huku Mshambuliaji huyo kutoka DR Congo akianzishwa.

Kocha Nabi amesema ameamua kufanya maamuzi ya kumunzisha Mshambuliaji huyo, baada ya kumtaka ampe changamoto Mshambuliaji tegemeo Fiston Mayele ambaye kwa kipindi kirefu amekua chaguo lwa kwanza la kocha huyo.

Amesema anaamini Makambo anaweza kutoa changamoto kwa Mayele na akafunga mbao, lakini mpango huo anatakia kuutendea haki kwa vitendo ili ashawishike kumtumia mara kwa mara.

“Ninamuhitaji Makambo ampe changamoto Fiston Mayele, niko tayari kumpa muda zaidi kama atakuwa na mwendelezo wa kuonyesha uwezo bora zaidi, hii ni timu ambayo kila mmoja ana nafasi, kitu kilichobaki ni juhudi za mchezaji mwenyewe kupigania nafasi.” amesema Kocha Nabi

Hata hivyo katika mchezo dhidi ya Geita Gold FC, Makambo hakumaliza dakika 90, kufuatia nafasi yake kuchukuliwa na Mshambuliaji mwenzake Fiston Maleye.