Jurgen Klopp
Kocha wa Liverpool Jurgen Klopp amesema Manchester United imekuwa na msimu mzuri lakini hadhani kama itaweza kufanya hivyo kwa muda mrefu kutokana na aina ya usajili ambao wamekuwa wakifanya.
Kocha Klopp ametoa maneno hayo juzi Ijumaa wakati akizungumza na waandishi wa habari kuelekea mchezo wa EPL dhidi ya wapinzani wa karibu Manchester United utakaochezwa Jumapili Machi 5 saa 1 usiku, Anfield.
Kocha huyo wa zamani wa Borussia Dortmund ametaja wachezaji kama Casemiro, Weghorst na Raphael Varane kama sehemu ya wachezaji muhimu kwenye kikosi hicho lakini muda wao wa kufanya vizuri kwa muda mrefu haupo.
Katika hatua nyingine, Jurgen Klopp ameeleza kufurahishwa na kiwango ambacho amekuwa akionyesha mshambuliaji wa kimataifa wa England Marcus Rashford tangia kurejea kutokea Kombe la Dunia Qatar.
Rashford katika umri wa miaka 25, msimu huu amefunga jumla ya magoli 25 wakati msimu uliopita 2021/22 alifunga bao tano pekee.
“Ni vigumu kufurahia mafanikio ya Manchester United kama ni kocha wa Liverpool lakini kuna vitu vizuri ambavyo wanafanya hivi sasa”, alisema Klopp.
“Ninafurahi kuona Rashford akiimarika kulinganisha na msimu uliopita”.
Pamoja na kuwa na Rashford ambaye yuko kwenye ubora mkubwa kwa hivi sasa, Klopp aliyeiewezesha Liverpool kushinda taji la Ligi Kuu England baada ya miaka 30 anahofia uwezo wa kiungo mshambuliaji Bruno Fernandes, Casemiro na Fred.
“Napenda namna ambavyo Bruno amekuwa akicheza na kukaa kwenye maeneo hatari zaidi muunganiko wa Casemiro na Fred ni shida sana kuudhibiti”.