Mtibwa inahitaji maombi Bara

Jahazi la Mtibwa Sugar, limezidi kuzama kwenye Ligi Kuu Bara baada ya jana kufungwa bao 1-0 na Coastal Union na kuzidi kujiweka pabaya katika janga la kushuka daraja.

Mabingwa hao wa zamani walivaana katika pambano kali lililopigwa kwenye Uwanja wa Mkwakwani, jijini Tanga na bao pekee la dakika ya 12 lililowekwa kimiani na Semfuko Charles lilizidi kuiweka pabaya Mtibwa inayoburuza mkia ikivuna pointi nane katika mechi 16 ilizocheza hadi sasa wakati Wagosi wamejikita nafasi ya nne ikiwa na pointi 26 katika mechi 17.

Mtibwa iliwahi kutwaa ubingwa wa Bara misimu miwili mfululizo 1999 na 2000 wakati Coastal Union ilibeba 1988 na katika pambano la jana, kila mmoja iliingia kutafuta bao la mapema na Semfuko aliiwabeba wenyeji likiwa ni bao la tatu msimu huu.

Ushindi huo ni wa pili mfululizo kwa Coastal baada ya mechi iliyopita kushinda pia 1-0 dhidi ya Dodoma Jiji na kuifanya timu hiyo kufikisha ushindi wa saba, sare mitano na kupoteza mitano katika michezo 17 iliyocheza hadi sasa.

Kwa upande wa Mtibwa inayonolewa na nyota wa zamani wa timu hiyo, Zubery Katwila, kipi hicho ni cha 12 msimu huu, huku yenyewe ikishinda mechi mbili sawa na ilizotoka sare katika michezo 16 iliyocheza na kuzidi kuiweka katika nafasi mbaya ya kushuka daraja ikiwa ni mara ya kwanza tangu ilipopanda daraja mwaka 1996.

Hicho ni kipigo cha pili kwa Mtibwa mbele ya Mkwakwani kwani msimu uliopita ililala pia kwa bao 1-0 lililowekwa kimiani na Gustapha Saimon mechi iliyopigwa Aprili 23 mwaka huu.