Msimamo wa Arteta kwa Pepe

Mikel Arteta amemwambia Nicolas Pepe kwamba hataichezea Arsenal tena – huku wakuu wa klabu wakijaribu kukubaliana malipo na raia huyo wa Ivory Coast.

Winga huyo hatajumuishwa kwenye kikosi, hata kama wakuu wa klabu watashindwa kukubaliana malipo. Arsenal wamekubali kwamba hawatapata pesa zozote walizompa Lille mwaka wa 2019.

Pepe, 28, alijiunga na Arsenal kutoka Lille kwa mkataba wa pauni milioni 72 miaka minne iliyopita, na kuwa rekodi yao ya usajili. Amefunga mabao 27 katika mechi 112 akiwa na The Gunners lakini ameshuka kiwango chini ya Arteta na akatumia msimu uliopita kwa mkopo katika klabu ya Nice ya Ufaransa.

Pepe alifunga mabao manane wakati akiwa Nice lakini alishindwa kupata klabu mpya wakati wa usajili wa majira ya kiangazi. Bado ana miezi 12 iliyosalia kwenye mkataba wake na hataweza kukamilisha uhamisho hadi Januari – isipokuwa mkataba huo utakatishwa.

Kuhamia Saudi Pro League kabla ya dirisha lao la uhamisho kufungwa Ijumaa kunaonekana kutowezekana, ingawa timu za Uturuki zinaweza kusajili wachezaji hadi Septemba 15. Arsenal wako tayari kumwachilia Pepe lakini watahitaji kukubaliana malipo, huku mazungumzo yakiendelea.

Kukosa dakika kwa Pepe ni kichocheo kikubwa kwake kuondoka Emirates kwa makubaliano.

Aliachwa nje ya kikosi cha Ivory Coast kitakachocheza mwezi huu dhidi ya Lesotho na Mali, huku Kombe la Mataifa ya Afrika likifanyika nchini Ivory Coast mwanzoni mwa 2023.