Abuutwalib Mshery
Baada ya kukaa nje ya uwanja kwa miezi tisa, kipa Abuutwalib Mshery ameendeleza rekodi yake dhidi ya Coastal Union akikaa langoni dakika 270 bila kuruhusu nyavu zake kutikiswa anapokutana na Wagosi hao.
Mshery aliyetua Yanga dirisha dogo msimu uliopita alianza kukaa langoni dhidi ya Coastal ugenini wakati Yanga ikiibuka na ushindi wa mabao 2-0 na mechi ya mwisho mchezo wa kuamua ubingwa dhidi ya Wagosi aliisaidia timu hiyo kumaliza msimu kwa ushindi wa 3-0.
Kipa huyo kabla ya kutua Yanga mchezo wa mwisho wa ligi akiwa Mtibwa Sugar aliiongoza timu hiyo kumaliza dakika 90 kwa ushindi wa bao 1-0, hivyo kucheza dakika 360, zikiwamo 270 akiwa na Yanga bila kuruhusu bao dhidi ya Coastal na mwenyewe kafunguka juu ya kismati alichonacho kwa Wagosi.
Akizungumza na Mwanaspoti, Mshery alisema miezi tisa bila mechi yoyote ya ushindani na kuaminiwa kupata nafasi ya kucheza dakika 90 kwenye mechi ya ushindani kumempa nguvu na imani kubwa kuwa ana kila sababu ya kuendelea kupamana na hakuna kinachoshindikana.
“Haikuwa rahisi licha ya kuwa na uhitaji wa kucheza baada ya kukaa nje kwa muda mrefu. Nilipoambiwa kesho nitakuwa langoni nilikuwa na furaha na mpango ulikuwa ni kuona naanza vizuri ili kuendelea kumpa imani kocha wangu kuniamini zaidi. nashukuru hilo lilitimia,” alisema Mshery.
“Siyo bahati ni malengo na uwezo wa kikosi chetu msimu huu. Nilikaa langoni lakini nilikuwa na watu wengine kumi wa kunilinda kila mmoja alifanya kazi kwa usahihi dakika 90 zilivyoisha ziliamua ushindi upande wetu.”
Mshery alisema sasa yupo fiti kuipambania Yanga na Taifa Stars ambako ameitwa na kocha Adel Amouroch, licha ya kuwa nje kwa muda ameonwa umuhimu wake