Mshery: Manungu imeniheshimisha

Kipa wa Young Africans SC, Aboutwalib Mshery, amesema kitendo cha kutangaza ubingwa wa Ligi Kuu ya NBC kwenye Uwanja wa Manungu Complex uliopo Turiani mkoani Morogoro kwake ni heshima kubwa.

Mshery amebainisha kwamba heshima hiyo inakuja kutokana na uwanja huo kumkuza kisoka kabla ya kuhamia Young Africans SC, huku pia akisema hapo ni nyumbani na anaporudi kucheza anakumbuka mambo mengi sana.

Young Africans SC wametwaa ubingwa wa Ligi Kuu ya NBC kwa msimu wa tatu mfululizo baada ya kuifunga Mtibwa Sugar magoli 3-1 katika mchezo uliochezwa jana Jumatatu kwenye Uwanja wa Manungu Complex.

Ushindi huo umewafanya kufikisha pointi 71 ambazo haziwezi kufikiwa na timu yoyote pinzani kwa mechi zilizosalia ambazo ni tatu.