Mrithi wa Djuma Shaban Yanga Atajwa

BEKI wa kati wa Yanga, Ibrahim Abdallah Hamad ‘Bacca’, amekabidhiwa jukumu la kurithi mikoba ya kucheza upande wa kulia baada ya kikosi hicho kuikosa huduma ya Djuma Shaban aliyefungiwa mechi tatu.

Bacca atakuwa akisaidiana na Paul Godfrey ‘Boxer’ kipindi ambacho Djuma atakuwa akitumikia adhabu iliyotokana na kumpiga kiwiko mchezaji wa Polisi Tanzania.

Mkurugenzi wa Mashindano wa Yanga, Thabity Kandoro, alisema kuwa: “Kuna uhaba wa mabeki halisia wa kulia kwenye kikosi chetu, Kibwana Shomary ni mgonjwa na Djuma amefungiwa, hivyo mwalimu ameamua kumtumia Bacca kwenye eneo hilo.

“Bacca atakuwa anapishana na Boxer ambaye kwa sasa ndiye beki pekee wa kulia anayecheza kwa ufanisi eneo hilo, ingawa kuna wakati Dickson Job naye hucheza huko kama kukikosekana mbadala.”

Katika mchezo wa juzi Jumamosi wa hatua ya 32 bora ya Kombe la Shirikisho la Azam Sports kati ya Yanga dhidi ya Mbao FC, Boxer alianza kikosi cha kwanza akicheza beki wa kulia, huku Bacca akiwa benchi.