Mourinho: Ancelotti atakuwa kichaa kuondoka Real Madrid

Kocha wa Roma, Jose Mourinho amemshauri Carlo Ancelotti kutoondoka Real Madrid kwa madai kwamba ni mtu mwenye ukichaa pekee anayeweza kuachana na kazi ya kuinoa timu hiyo ya jijini Madrid.

Kauli ya Mourinho imekuja wakati kigogo mmoja wa Shirikisho la Soka Brazil (CBF) amenukuliwa akisema kwamba Ancelotti atainoa timu ya taifa ya Brazil kwenye fainali za Copa America 2024 zitakazofanyika nchini Marekani.

Pamoja na kutolewa kwa kauli hiyo hadi sasa hakuna mkataba wowote uliosainiwa kati ya Ancelotti na CBF licha ya habari hiyo kuzidi kupata nguvu siku hadi siku.

Akizungumza na chombo kimoja cha habari nchini Italia, Mourinho alisema, “nafikiri ni mtu mwenye ukichaa pekee atakayeondoka Real Madrid wakati bado anahitajika.”

“Ninaamini kwamba kwa alama ninazoziona kwa Florentino, (Perez, rais wa Real Madrid) Ancelotti atabaki kwa sababu ni mtu sahihi kwa Real Madrid na Real Madrid ni sahihi kwake,” alisema Mourinho.

Katika hali ya kushangaza Mourinho, kocha wa zamani wa FC Porto, Chelsea, Man United, Tottenham na Inter Milan pia alisema kwamba mtu huyo mwenye ukichaa ni yeye pekee ambaye aliachana na Real Madrid licha ya kuungwa mkono na Perez.

Mourinho pia alisisitiza azma yake ya kutaka kuwa kocha nchini Saudi Arabia wakati huu majaliwa yake katika klabu ya Roma yakionekana kuwa njia panda huku mkataba wake ukiwa unafikia ukomo mwishoni mwa msimu huu.

“Je nitaendelea kuwa Roma, sijui,” alisema Mourinho na kufafanua kuwa hata mazungumzo yake ya hivi karibuni na mmiliki wa klabu ya Roma, Dan Friedkin yaliangalia zaidi mambo ya mwaka huu na si mambo yajayo.