Mkali wa mabao Championship awataka Manula, Mwamnyeto

Kinara wa mabao Championship, Fabrice Ngoy, amesema licha ya mafanikio aliyopata kwa muda mfupi, lakini hesabu zake ni kucheza ligi kuu ili kukutana na kipa Aish Manula (Simba) na beki Bakari Mwamnyeto wa Yanga.

Nyota huyo raia wa DR Congo ndiye kinara wa mabao akiwa nayo 12 na kuiweka timu yake Kitayosce nafasi ya pili kwa pointi 38 wakiachwa pointi tano na vinara, JKT Tanzania wenye 43.

Straika huyo ambaye anacheza soka hapa nchini kwa mara ya kwanza alijiunga na timu hiyo ya mkoani Tabora akitokea Real Nakonde FC ya nchini Zambia, ambapo kasi yake imekuwa ya moto.

Jana staa huyo wa kigeni aliingia kwenye rekodi ya kuwa miongoni mwa wachezaji wawili kufunga mabao matatu ‘hatitriki’ alipoiongoza timu yake kuinyuka Ndanda 3-0 akiungana na Mishamo Michael wa Ken Gold kwenye ligi hiyo.

Ngoy ameiambia Mwanaspoti kuwa kuongoza kwenye orodha ya wafungaji bora hadi sasa kwake ni mafanikio makubwa ikiwa ni mara ya kwanza kucheza katika ardhi ya Tanzania.

Amesema pamoja na mafanikio hayo, ndoto na matamanio yake ni kuipandisha timu ili msimu ujao aonje ladha ya ligi kuu ili kukutana na vipenzi wake, Manula na Mwamnyeto ambao anawakubali kwa muda mrefu.

“Timu nyingi nazijua hata Simba, Yanga, Kagera Sugar na Mbeya City ila nawakubali sana Manula na Mwamnyeto natamani nipandishe timu yetu ili nikutane nao siku moja ligi kuu,” amesema Ngoy.

Hata hivyo amesema kutokana na mpira kuwa kazi yake, hatosita kupokea ofa kutoka timu yoyote ambayo itahitaji huduma yake kimsingi ni makubaliano.