Minziro atahadharisha Ligi Kuu

Pamoja na kuonja ushindi wa kwanza kwenye Ligi Kuu, kocha mkuu wa Tanzania Prisons, Fredi Felix ‘Minziro’ amesema ligi ni ngumu akiwafungia kazi mabeki wake kutoruhusu idadi kubwa ya mabao.

Prisons ilicheza mechi nne mfululizo bila ushindi na wiki iliyopita ikiwa Sokoine jijini hapa,

iliilaza Mtibwa Sugar mabao 3-2 ukiwa ni ushindi wa kwanza na kujinasua mkiani kupanda nafasi ya 13 kwa pointi nne. Pamoja na ushindi huo, timu hiyo iliendelea kuruhusu bao katika michezo minne mfululizo na kujikuta ikifungwa jumla ya mabao 11 ikifunga manne.

Katika mchezo huo, Minziro alisema wachezaji walibadilika tofauti na mechi zilizopita lakini ligi ni ngumu na timu inahitaji maboresho.

Aliongeza kuwa ushindi umeongeza nguvu, ari na morali akiwataka nyota wake kuendeleza kasi ili kukusanya kujiweka nafasi nzuri, huku akiitaka beki kutoruhusu mabao.

“Sehemu ya beki bado kuna upungufu kwa sababu kila mechi tumeruhusu bao. Niwapongeze wachezaji kwa kupambana kupata pointi tatu za kwanza ambazo zimeongeza nguvu,” alisema Minziro.

Shabiki wa timu hiyo, Ally Ramadhan alisema baada ya ushindi matarajio yao ni kuendeleza ubabe Ligi Kuu.