Mechi ya Europa yageuka ulingo wa ndondi

Mechi ya soka ya Ligi ya Europa jana kati ya wenyeji PSV Eindhoven dhidi ya Sevilla iligeuka kuwa ulingo wa ndondi baada ya shabiki mmoja kuingia uwanjani wakati wa mechi na kumtupia ngumi golikipa wa Sevilla, Marko Dmitrovic.

Ilikuwa siku mbaya kwa shabiki huyo maana mlinda mlango huyo hakuwa mzembe baada ya kujibu mapigo na kumdondosha chini kabla ya watu wa usalama kuingilia kati.

Shabiki huyo alijaribu kujiondoa mikononi mwa Dmitrovic lakini mlinda mlango huyo raia wa Serbia alikuwa imara mpaka walinzi walipokuja na kumtoa shabiki huyo nje ya uwanja.

PSV Eindhoven ilishinda 2-0 lakini imeshindwa kufuzu hatua ya 16 bora kufuatia kipigo cha jumla (aggregate) cha 3-2 dhidi ya miamba hiyo ya Uhispania.