Mbeya Kwanza
Timu ya Mbeya Kwanza FC imeweka rekodi ya kushinda mechi saba mfululizo katika Ligi ya Championship inayoendelea kwenye viwanja mbalimbali hapa nchini ili kusaka timu zitakazocheza Ligi Kuu Tanzania Bara msimu ujao.
Ushindi wa bao 1-0 ilioupata dhidi ya Biashara United katika mechi ya juzi umeifanya timu hiyo kufikisha ushindi wa saba mfululizo, ikiwa ni timu pekee iliyofanya hivyo kwenye ligi hiyo msimu huu.
Mara ya mwisho timu hiyo ilipoteza mechi Oktoba 29, mwaka huu ilipofungwa mabao 2-0 dhidi ya Kitayosce, lakini baada ya hapo ilicharuka na kuanza kutoa vipigo kwa kila timu waliyokutana nayo.
Hata hivyo, pamoja na kushinda mechi zote hizo, Mbeya Kwanza iliyocheza Ligi Kuu Tanzania Bara msimu wa 2021/22 na msimu huo huo kushuka, inashika nafasi ya nne katika msimamo wa ligi hiyo ikiwa na pointi 27 baada ya kushuka dimbani michezo 14.
Mpaka sasa ligi hiyo inaongozwa na Maafande wa JKT Tanzania wenye pointi 34, Kitayosce ikifuatia kwa kujikusanyia pointi 32 na Pamba ikiwa katika nafasi ya tatu ikimiliki pointi 28.