Mbappe kuhamia Madrid : ‘Ndoto yangu imetimia'

Mshambulizi wa kimataifa wa Ufaransa Kylian Mbappe anasema ni "ndoto yangu kutimia" huku uhamisho wake wa kuelekea Real Madrid ukithibitishwa Jumatatu jioni.

Mbappe, 25, atahamia Uwanja wa Bernabeu kwa mkataba wa miaka mitano mkataba wake wa Paris St-Germain utakapokamilika tarehe 30 Juni.

Atapata euro 15m (£12.8m) kwa msimu, pamoja na bonasi ya usajili ya euro 150m (£128m) itakayolipwa kwa miaka mitano, na atahifadhi asilimia ya haki zake za picha.

"Hakuna mtu anayeweza kuelewa jinsi ninavyofurahi sasa hivi!" Mbappe alichapisha kwenye Instagram.

"Ndoto yangu imetimia. Nina furaha na kujivunia kujiunga na klabu ya ndoto zangu."

Atajiunga na timu ya Madrid ambayo haijatwaa ubingwa wa La Liga huku ikitwaa taji la 15 la Ulaya lililoweka rekodi kwa ushindi dhidi ya Borussia Dortmund kwenye fainali ya Ligi ya Mabingwa.

Kuwasili kwa Mbappe katika mji mkuu wa Uhispania huenda kukaibua mapendekezo ya enzi mpya ya Galacticos katika klabu kutokana na matarajio ya kusisimua ya yeye kujiunga na washambuliaji wa Brazil Vinicius Jr, Rodrygo na mchezaji mwenzake mpya Endrick , na kiungo wa kati wa Uingereza Jude Bellingham.

Mbappe alikubali kwa mdomo kujiunga na Real mwezi Februari na akatangaza Mei kuwa atawaacha mabingwa hao wa Ufaransa mwishoni mwa msimu huu.

Anaondoka katika mji mkuu wa Ufaransa kama mfungaji bora wa PSG, akiwa na mabao 256 tangu ajiunge nayo kutoka Monaco kwa mkopo wa awali mnamo 2017.

Fowadi huyo alifunga mabao 44 katika mechi 48 msimu uliopita na amekuwa mfungaji bora katika ligi kuu ya Ufaransa kwa miaka sita iliyopita.