Kylian Mbappe
Nyota wa PSG, Kylian Mbappe amesisitiza kuwa yeye sio kama mwanatimu mwenzake Lionel Messi, au Cristiano Ronaldo wa Manchester United.
Kinda huyu machachari mwenye miaka 22, ambaye aliyekuwa na mchango mkubwa kwa Ufaransa kutwaa kombe la Dunia mwaka 2018, amekuwa akitajwa kuwa anafuata nyayo za mafundi wa soka Lionel Messi na CR7.
Usiku ambao Lionel Messi amechukua Ballon d’Or kwa mara ya 7, Mbappe alimaliza katika nafasi ya tisa, ya waliokuwa wanapigiwa kura kwa ajili ya tuzo hii , ambayo ni alama ya mwanasoka bora zaidi wa mwaka duniani.
Staa huyu anaamini kuwa ana kazi kubwa ya kuifanya kuzifikia levo za watangulizi wake ambao hajataka kujiweka kwenye kapu moja pamoja nao.
Akizungumza kabla ya kumkabidhi nahodha wa Barcelona Alexia Putellas taji la Ballon d’Or kwa upande wa wanawake, staa huyu alisema:
“Ni furaha lakini mimi si kama Messi na Ronaldo. Wameshinda mara nyingi, ni magwiji. Nina bahati ya kucheza na Leo na kujifunza kupitia kwake kila siku. Kuwa na jina langu karibu na lao pekee ni fahari.”
Mbappe, ambaye anaendelea kuhusishwa na Real Madrid, amechangia mabao tisa na asisti 10 katika mechi 19 alizoanza katika michuano yote msimu huu.