Mecky Maxime
Uongozi wa Dodoma Jiji umefikia makubaliano na aliyekuwa Kocha Mkuu wa Singida Black Stars, Mecky Maxime kwa ajili ya kukinoa kikosi hicho msimu ujao.
Hatua hiyo inafuatia baada ya Maxime kuachana na Singida BS (zamani Ihefu) kumpisha kocha wa zamani wa Simba na AFC Leopards, Patrick Aussems aliyetangazwa wikiendi hii kutoka katika timu hiyo.
Taarifa ambazo Mwanaspoti imezipata kutoka ndani ya uongozi wa Dodoma zilieleza, Maxime amesaini mkataba wa miaka miwili ingawa kuna kipengele cha kuongeza mwaka mmoja huku aliyekuwa kocha wa kikosi hicho Mkenya, Francis Baraza akitimuliwa.
“Ni kweli tumefikia makubaliano hayo na alishasaini mkataba kabla ya Ligi Kuu Bara kufikia tamati, tunaamini sana katika uwezo wake ndio maana hatukufanya makosa kumsainisha kwa sababu kazi aliyoifanya alikotoka inajieleza,” kilisema chanzo hicho.
Kwa upande wa Maxime alipotafutwa alisema, hawezi kuzungumza chochote kwa sababu baada ya Ligi Kuu kuisha ameamua kupumzika.
“Muda ukifika utajua nitakapoenda, ila siwezi kusema chochote kwani bado ni mapema na lolote linaweza kutokea mbeleni.”
Maxime aliyewahi kuzifundisha timu kadha ikiwemo, Kagera Sugar ameachana na Singida Black Stars baada ya kumaliza nafasi ya saba katika msimamo wa Ligi Kuu ikivuna pointi 36 ikishinda michezo tisa.