Mastaa wajiongeze mitandaoni

Desemba 3, 2022 Kwenye stage ya Fiesta msanii Ommy Dimpoz alimpandisha mshambuliaji hatari wa Yanga Fiston Kalala Mayele.

Wakati Mayele akionekana kwenye stage usiku wa manane kesho yake kulikua na mchezo wa Yanga dhidi ya Tanzania Prisons.

Bahati nzuri kwa Yanga, Mayele na Kocha Nabi ni kwamba mechi hiyo Yanga ilishinda bao 1-0, bao lililofungwa na Feisal Salum dakika ya 89 ya mchezo.

Wengi walijua ukaribu wa Ommy Dimpoz na GSM ndio uliopelekea Mayele kukata mauno kwenye Fiesta. Walikua sahihi, lakini ukaribu huo huo haukumfanya Mayele apande jukwaani BURE!

Mayele alisaini mkataba wenye pesa ndefu kucheza dakika chache alizocheza pale jukwaani. Ni wachezaji wachache wanaoweza kumvimbia rafiki wa Boss. Wengi hasa wazawa wanaishi kishkaji na kisela sana kiasi kwamba wanashusha thamani yao.

Ni Mayele huyu huyu alisaini mkataba mnono wa matangazo ya GSM kipindi cha Christmas. Wachezaji wengine wajifunze kutengeneza kipato nje ya uwanja ili kukuza Brand zao kwenye jamii.

Mohamed Hussein, Clatous Chama,Aziz Ki na Farid Musa wana mkataba na CRDB Bank. Mohamed pia ni balozi wa Airtel, huko nako anaingiza mkwanja wa maana. Feisal Salum na Aishi Manula nao wana mikataba na Tigo Tanzania.

Mchezaji mwenye followers zaidi ya milioni 1 hata akiacha kucheza hawezi kukosa Kampuni ya matangazo wanaoweza kumlipa laki 8+ kwa mwezi.

Wachezaji wajiongeze kidogo hasa huku social media kwakuwa na watu sahihi nyuma yao wanaoweza kusimamia account zao kwenye mitandao ya kijamii.