Joyce Lomalisa Mutambala.
Ile mechi ya Yanga na Namungo, Joyce Lomalisa alichezewa rafu mbaya na Hashim Manyanya lakini cha kushangaza, aliyefanya hilo kosa hakuonyeshwa kadi nyekundu.
Nini kilimfanya refa asimuadhibu Manyanya? Sidhani kama hata yeye mwenyewe akitazama marudio ya lile tukio atakuwa na jibu la kueleweka kwa nini hakumpa adhabu stahiki winga huyo wa Namungo.
Pongezi kwa refa Ahmed Arajiga ambaye alitoa adhabu ya kadi nyekundu kwa Haji Ugando wa Coastal Union aliyecheza rafu mbaya kwa Henock Inonga katika mchezo wao dhidi ya Simba.
Halafu kabla hatujasahau hayo, mwamuzi mwingine akaja kutoa penalti ambayo haikustahili katika mechi kati ya JKT Tanzania na Kagera Sugar pale kwenye Uwanja wa Kambarage Shinyanga ambayo iliwapa JKT bao la kuongoza.
Bahati nzuri kwa Kagera Sugar, walisawazisha bao hilo, dakika moja baadaye na wakapata pointi moja ingawa pengine wangepata tatu, lakini ikabakia ukweli kwamba waliumizwa na refa.
Sasa kumetokea kituko katika mechi ya Dodoma Jiji dhidi ya Azam FC juzi wenye Uwanja wa Jamhuri baada ya mwamuzi kukataa bao halali la wageni Azam akidai mfungaji Lusajo Mwaikenda alikuwa amotea.
Kwa yeyote ambaye alitazama mechi ile hata kurudia kutazama video za marudio ya bao, atakubaliana nami kwamba lilikuwa bao halali na mfungaji hakuotea.
Beki mmoja wa Dodoma alibaki na alionekana wazi lakini msaidizi akaamua anayoyajua yeye.
Haya yanatokea wakati Ligi Kuu Bara ikiwa haijafikisha hata raundi sita na kuna nyingi mbele zimebakia.
Tuchukue tahadhari kabla ya hatari vinginevyo mambo yataharibika zaidi mbele ya safari.