Manula, Mshery wanukia Azam, ishu nzima iko hivi

Azam FC inasaka kipa mzawa na inaelezwa kuwa aliyekuwa kipa namba moja wa timu hiyo Aishi Manula na Abuutwalib Mshery wapo kwenye rada yao.

Manula bado ana mkataba wa mwaka mmoja ndani ya Simba huku Mshery akiwa mchezaji huru baada ya mkataba wake kumalizika pale Yanga. Ingawa habari za ndani zinadai kwamba kuna udalali mkubwa kati dili hilo na huenda likatibuka.

COASTAL Union iko kwenye mazungumzo na beki wa zamani wa Yanga, Djuma Shaaban. Mkongomani huyo amekuwa nje ya uwanja kwa msimu mzima bila ya kuwa na timu baada ya kuachana na Yanga aliyoitumikia kwa misimu miwili 2021-2022 na 2022-2023. Inaelezwa kwamba jana alielekea Tanga kwa ajili ya kukutana na viongozi.

UONGOZI wa Dodoma Jiji upo katika mazungumzo na beki wa kulia wa Mtibwa Sugar, Nickson Mosha kwa ajili ya kuongeza nguvu kwenye kikosi chao ambapo kitakuwa chini ya Kocha Mecky Maxime. Licha ya timu yake kushuka daraja msimu uliomalizika, lakini beki huyo alionyesha uwezo mkubwa wa kupandisha mashambulizi na kushuka kukaba kwa uharaka.

WAKATI timu zikiendelea na usajili wa chinichini kujiandaa na msimu ujao, KenGold nayo haijalala ikielezwa ipo katika mazungumzo na makocha wawili raia wa Uganda, Abdallah Mubiru na Mathias Lule ili kuinoa timu hiyo. Lule na Mubiru waliwahi kuinoa Mbeya City kwa nyakati tofauti.

BAADA ya beki wa kulia wa Fountain Gate Princess, Sara Joel kudumu kwa misimu miwili kwenye mitaa ya Dodoma, timu mbalimbali zimetajwa kuiwania saini yake zikiwemo Simba Queens, Yanga Princess na Kampala Queens ya Uganda. Mkataba wake unamalizika mwishoni mwa msimu huu.

LICHA ya kuinusuru JKT Tanzania, kocha Malale Hamsini kocha huyo amepewa mkono wa kwaheri, huku Ahmed Ally aliyefanya vizuri na Tanzania Prisons akitajwa kuchukua mikoba yake. Chanzo cha kimesema wamefanya uamuzi wa kuachana na Malale na watamwambia muda wowote kuanzia sasa wakishaweka sawa.