Erling Haaland
Vigogo wa Manchester City wanadaiwa kuwa huenda wakajichimbia kaburi wenyewe kwa staa wao Erling Haaland na wakamkosa katika dirisha lijalo la majira ya kiangazi ikiwa watamsainisha mkataba mpya.
Man City ipo kwenye mazungumzo na wawakilishi wa Haaland ili kumsainisha mkataba mpya ambao utakuwa na kipengele kitakachomruhusu kuondoka ikiwa timu inayomhitaji itatoa Pauni 173 milioni.
Kwa mujibu wa taarifa kutoka Gazzetta dello Sport, Mabosi wa Man City wanataka kuweka kipengele hicho ili kuhakikisha hakuna timu itakayoweza kuvunja mkataba wake kwa sababu ni kiasi kikubwa sana cha pesa.
Hata hivyo mambo yanaweza kuwa tofauti ikiwa matajiri wa Saudia wataamua kumsajili kwani wameshaonyesha kuwa wanaweza kutoa kiasi kama hicho ama zaidi.
Katika dirisha lililopita la majira ya kiangazi PSG ilipokea ofa inayofikia Pauni 200 milioni ili kumuuza Mbappe ingawa dili lilifeli baada ya staa huyo mwenyewe kukataa, hivyo ikiwa Man City itaweka bei hiyo kwenye mkataba wa Haaland huenda ikalipwa na wakamkosa staa huyo tegemeo.
Haaland kwa sasa anahitajika sana na Real Madrid na Barcelona ambazo zilitamani kumsajili kabla hajajiunga na Man ity akitokea Borussia Dortmund.
Tangu kuanza kwa msimu huu fundi huyu wa kimataifa wa Norway mwenye umri wa miaka 23, tangu kuanza kwa msimu huu amecheza mechi 12 za michuano yote na kufunga mabao nane.
Mkataba wake wa sasa unatarajiwa kmalizika mwaka 2027 na Man City ina mpango wa kumuongeza miaka miwili zaidi sambamba na maboresho ya mshahara.