Beki wa Man United, Raphael Varane akitolewa nje baada ya kupata majeraha
Beki kutoka nchini Ufaransa na klabu ya Manchester United Raphael Varane ataukosa mchezo wa Ligi Kuu ya England dhidi ya Manchester City, utakaopigwa siku ya jumamosi mchana.
Varane anakabiliwa na majeraha ya msuli wa nyuma aliyoyapata juzi Jumanne (Novemba 02) kwenye mchezo wa Ligi ya Mabingwa Barani Ulaya dhidi ya Atalanta ya Italia, ukiwa mchezo wake wa pili tangu alipopona majeraha ya awali.
Mbali na kuikosa Manchester City, pia beki huyo atakosa michezo minne dhidi ya Watford, Villarreal, Chelsea na Arsenal.
Kukosekana kwa mlinzi huyo ni pigo kubwa kwa mashetani wekundu baada ya kuruhusu kufungwa mabao 11 kwenye michezo mitatu, ambayo alikosekana kikosini katika michuano mbalimbali.
Kando ya beki huyo, Machester United itakosa huduma ya Victor Lindolf kwenye mchezo dhidi ya Manchester City.
Varane anatarajiwa kuwa nje ya uwanja kwa kipindi cha mwezi mmoja atakachokuwa anauguza majeraha.