Jose Mourinho na Binti yake Matilde Mourinho
Wameshuhudia baba zao wakipiga pesa nyingi sana kupitia soka. Na sasa mabinti matata wa magwiji wa soka duniani wamejikuta kwenye wakati mzuri kabisa wa kupiga pesa zao wenyewe.
Binti wa staa wa zamani wa Chelsea, Amber alifanya kweli kwenye shindano la Love Island na kupiga pesa ndefu, lakini si yeye tu kwenye orodha ya mabinti wa wanasoka ambao wamekuwa wakipiga pesa nyingi na kuwa matajiri kutokana na kile wanachovuna kwa mwaka.
Kutokana na hilo, hii hapa orodha ya mabinti matata kabisa wa wanasoka ambao wamekuwa wakipiga mkwanja mrefu kwa mwaka.
Amber Wise - Sh1.5 bilioni Baba: Dennis Wise
Kwenye umri wa miaka 19 tu, tayari mrembo Amber Wise, binti wa kiungo wa zamani wa Chelsea, Dennis Wise anapiga pesa ndefu sana kwa mwaka, Pauni 500,000, ambazo ni zaidi ya Sh1.5 bilioni za Kitanzania. Na Love Island inaweza kuwa chanzo kikubwa sana cha pesa cha mrembo Amber.
Lakini, eneo jingine analoweza kupiga pesa za kutosha ni kwenye Instagram kuongeza wafuasi wake ambayo inaweza kuwa fursa ya kumsogezea matangazo ya kibiashara na kupiga mkwanja mrefu huko.
Gemma Owen - Sh4.6 bilioni Baba: Michael Owen
Tangu alipoonekana kwenye Love Island mwaka jana na kuwa namba mbili na mpenzi wake wa zamani, Luca Bish, mrembo Gemma, 20, amethibitisha kwamba ni mfanyabiashara hodari mwenye wafuasi milioni 1.9 huko Instagram.
Mrembo huyo amekuwa na kampuni yake ya mavazi ya ndani, OG Beachwear, ambayo yamekuwa sehemu ya chanzo chake cha kupiga pesa na hivi karibuni alichaguliwa kuwa balozi wa PrettyLittleThing.
Kupitia kampuni yake ya mavazi, mrembo Gemma anaripotiwa kuingiza Pauni 1.5 milioni kwa mwaka, ambayo ni zaidi ya Sh4.6 bilioni. Na amekuwa akifanya kazi ya utangazaji pia kwenye televisheni.
Hollie Shearer - Sh6.1 bilioni Baba: Alan Shearer
Binti wa Alan Shearer, mrembo Hollie, 28, ni mwimbaji na mwandishi wa nyimbo mwenye mvuto mkubwa wa umbo ambao umemsogezea wafuasi wengi sana, zaidi ya 70,000 kwenye mtandao wa Instagram.
Ripoti zinafichua kwamba kwa mwaka mrembo Hollie anavuna hadi Pauni 2 milioni, ambazo ni zaidi ya Sh6.1 bilioni za Kitanzania. Kinachoelezwa, Hollie ametumia vyema jina la baba yake, ambapo amejipatia dili nyingi za kurekodi na kuingia kwenye mitindo pia, ambayo imemfanya kuwa na nguvu kubwa kwenye mitandao ya kijamii. Ripoti zinadai kwamba Hollie amekuwa na uhusiano wa kimapenzi na mkali wa rugby wa England, Joe Marchant, 26, tangu Aprili 2022.
Matilde Mourinho - Sh9.2 bilioni Baba: Jose Mourinho
Inaonekana kabisa kwamba Jose Mourinho si yeye pekee ni Special One kwenye familia, kutokana na kile anachofanya binti yake, Matilde, 27, kwenye biashara yake ya vito vya dhahabu kupitia Matilde Jewellery. Kampuni hiyo inatoza hadi Pauni 1,850 kwa kila kipuli kwa wanaume na wanawake, kitu ambacho kinamfanya binti huyo wa Mourinho kupiga mkwanja mrefu sana.
Alichaguliwa mshindi kwenye tuzo ya Emerging Brand of the Year katika tuzo za Professional Jeweller. Biashara yake hiyo, inamfanya Matilde avune hadi Pauni 3 milioni kwa mwaka, ambayo ni zaidi ya Sh9.2 bilioni.
Estelle Bergkamp - Sh6.1 bilioni Baba: Dennis Bergkamp
Binti wa staa wa zamani wa Arsenal na Uholanzi, Dennis Bergkamp, mrembo Estelle Bergkamp, 27, ni mtayarishaji wa maudhui mbalimbali mtandaoni, ambayo yamekuwa na nguvu kubwa na kumfanya awe anapata kipato kikubwa kinachofikia Pauni 2 milioni kwa mwaka, ambazo ni zaidi ya Sh6.1 bilioni za Kitanzania.
Mrembo huyo amekuwa na uhusano pia wa kimapenzi na kiungo wa Manchester United, Donny van de Beek, ambaye walifanikiwa kupata mtoto wao wa kike, Lomee. Kwa kuwa na uwezo huo wa kupiga pesa nyingi, umemfanya mrembo Estelle kuwa miongoni mwa mabinti wa wanasoka wa zamani wanaopiga mkwanja mrefu kwa mwaka.
Alicia Scholes - Sh3.1 bilioni Baba: Paul Scholes
Staa wa zamani wa Manchester United, Paul Scholes amerithisha damu yake ya michezo kwa binti yake wa miaka 22, mrembo Alicia, ambaye ni mchezaji wa netiboli na ana nafasi ya kuwa staa mkubwa sana kwenye mchezo huo.
Baada ya kuchaguliwa kwenye Future Roses kwa mara ya kwanza mwaka jana, Alicia sasa amejiweka kwenye nafasi nzuri ya kujumuishwa kwenye timu ya Olimpiki 2024 itakayokwenda Paris, Ufaransa. Wafuasi wake 111,000 kwenye mtandao wa Instagram umemsogezea mezani dili nyingi za udhamini wa matangazo ya kibiashara. Na kinachoelezwa ni kwamba Alicia anaingiza kipato cha Pauni 1 milioni kwa mwaka, zaidi ya Sh3.1 bilioni.
Maria Guardiola - Sh6.1 bilioni Baba: Pep Guardiola
Kwa kuwa na wafuasi 700,000 kwenye ukurasa wake wa Instagram, huo ni mtaji kwa mrembo, Maria Guardiola, ambaye ni binti wa kocha wa Manchester City, Pep Guardiola katika kupiga pesa.
Maria, amekuwa akishughulisha pia na masuala ya mitindo na kuwa mhamasishaji kwenye mitandao, ambapo imekuwa fursa kubwa kwake katika kujipatia kipato. Ripoti zinafichua kwamba, Maria Guardiola ana kipato cha Pauni 2 milioni, ambayo ni zaidi ya Sh6.1 bilioni, ambazo hizo amekuwa akizivuna ndani ya mwaka mmoja. Kuwa na uwezo wa kutengeneza pesa nyingi hivyo, hilo linamfanya Maria asiwe tegemezi kwa baba yake.
Bianca Gascoigne - Sh4.6 bilioni Baba: Paul Gascoigne
Binti wa staa wa zamani wa soka, Paul Gascoigne 'Gazza', mrembo Bianca Gascoigne, 36, ni mwanamitindo na alianza shughuli zake hizo za mitindo mwaka 2006. Na amekuwa akionekana kwenye michezo ya televisheni kwa miaka mingi sana, akianzia kwenye Celebrity Big Brother hadi kwenye Celebrity Coach Trip.
Hivi karibuni alionekana kwenye shindano la kudansi la Dancing With The Stars Italia - alipomaliza nafasi ya pili. Kwenye Instagram, Bianca ana wafuasi 344,000 huku kipato chake kikielezwa kuwa ni Pauni 1.5 milioni, ambazo ni zaidi ya Sh4.6 bilioni.
Dalma Maradona - Sh6.1 bilioni Baba: Diego Maradona Dalma Maradona, 36, ni Mwigizaji wa Kiargentina aliyepata mafanikio makubwa sana, akiwa ameanza kazi hiyo ya uingizaji tangu alipokuwa na miaka tisa, kupitia vipindi vya watoto vya televisheni, Cebollitas.
Mrembo, Dalma ambaye anawafuasi milioni 1.8 kwenye mtandao wa Instagram, ameonekana kwenye filamu nyingi sana. Filamu yake ya hivi karibuni ni ile ya Los Inquilinos. Ripoti zinafichua kwamba jambo hilo limempatia Dalma pesa za kutosha na sasa kipato chake kinaelezwa kuwa ni Pauni 2 milioni, ikiwa ni zaidi ya Sh6.1 bilioni za Kitanzania. Dalma ni moja ya mabinti wa wanasoka maarufu wenye pochi nene.
Jade Leboeuf - Sh6.1 bilioni Baba: Frank Leboeuf
Beki wa zamani wa Chelsea na Ufaransa, Frank Leboeuf alihamia kwenye filamu baada ya kutundika daruga. Na kwenye kazi hiyo ya uingizaji ameungana na binti yake, mrembo Jade LeBoeuf, 32. Kingine, Jade ni mwanamitindo maarugu sana, huku moja ya filamu zake zilizofanya vizuri ni ile ya Everlasting iliyotoka mwaka 2016.
Amekuwa akifanya kazi za uhamasishaji wa masuala mbalimbali kwenye mitandao ya kijamii, ambako ana wafuasi zaidi ya 171,000. Ripoti zinafichua kwamba kipato cha mrembo Jade ni Pauni 2 milioni, ambazo ni zaidi ya Sh6.1 bilioni za Kitanzania.
Danielle Favatto - Sh6.1 bilioni Baba: Romario Favatto
Tangu alipojifungua binti yake, Maria, aliyezaa na mwanasoka Fabio Henrique, Januari mwaka huu, binti wa mwanasoka mahiri wa Kibrazili, Romario - mrembo Danielle Favatto, 25, amekuwa akipiga pesa nyingi kutokana na uhamasishaji wake kwenye masuala ya uzazi. Jambo hilo limemfanya hadi kuanzisha akaunti yake mtandaoni ya OnlyFans.
Binti huyo maarufu mtandaoni amekuwa akitumika pia kama balozi wa makampuni ya kubeti huko kwao Brazil, jambo ambalo limekuwa likimwingizia pesa nyingi. Kipato chake kinadaiwa ni Pauni 2 milioni ni zaidi ya Sh6.1 bilioni za Kitanzania.