Lingard hana kazi lakini anaishi kibosi

Hadi sasa hajapata timu ya kuichezea, licha ya ripoti mbali mbali kudai Al Ettifaq ambayo anafanya nayo mazoezi kwa sasa ipo kwenye mpango wa kumsajili, itabidi asubiri hadi dirisha la majira ya baridi mwakani kwa sababu timu hiyo itatakiwa kuachia kwanza mchezaji ili kumsajili yeye.

Hivyo kwa sasa fundi huyu hapati mshahara lakini bado ameendelea kuishia maisha ya kibosi kutokana na mpunga wa kutosha alioukusanya na anaoendelea kuukusanya kutokana na madili yake mengine nje ya uwanja.

ANAPIGAJE PESA?

Mara ya mwisho akiwa na Nottingham alikuwa akipokea mshahara unaofikia Pauni 180,000 kwa wiki na alikuwa mchezaji anayelipwa zaidi kwenye timu hiyo.

Yupo kwenye mkataba wa ubalozi na Kampuni ya Nike ikiwa ni baada ya kuachana na Adidas, kupitia mkataba huu Lingard anakunja zaidi ya Pauni 500,000 kwa mwaka.

Lingard pia anafanya kazi na kampuni za Right Guard na Storelli Sports, ambazo huwa zina kazi ya kuunda fasheni mpya ya vifaa mbalimbali vya michezo ikiwa pamoja na gadi za miguuni.

Alianzisha brandi yake aliyoipa jina la ‘JLINGZ’ ikiwa ni ufupisho wa jina lake.

Ana mkataba wa ubalozi pia na kampuni ya The Edit LDN ambayo inatengeneza na kusambaza viatu ambavyo si vya michezo.

Brandi hiyo inajihusisha na utengenezaji wa bidhaa mbalimbali kama kofia, t-shirts na sweta.

Staa huyu pia ana ubalozi wa kampuni ya utengenezaji wa saa ya Tag Heuer. Anamiliki hisa kwenye kampuni inayozalisha vipodozi vya aftershave.

MSAADA KWA JAMII

Amekuwa akishiriki kwenye matamasha tofauti tofauti ya kukusanya pesa kwa ajili ya kuchangia jamii kama lile la One Love Manchester Concert, lililofanyika mwaka 2017, ambalo lilikusanya jumla ya Pauni 2 milioni

Mwaka 2017, baada ya shambulio la kigaidi lililofanyika Manchester Arena, Lingard na wachezaji wenzake waliwatembelea majeruhi wa shambulio hilo na kuwapa misaada mbali mbali.

NDINGA

Mercedes-AMG A45 Dola 55,350

Lamborghini Urus Dola 230,000

Mercedes-AMG C63 S Coupe - Pauni 80,000

Range Rover Sport SVR -Pauni 120,000

Bentley Bentayga - Pauni 180,000

Bentley Continental GT - Pauni 200,000

MJENGO

Ana mjengo wa kifahari wenye thamani ya Pauni 3.25 milioni uliopo Cheshire, jijini Manchester. Mjengo huo wa kifahari ndani yake una vyumba vitano ambavyo kila kimoja kina choo chake ndani.

Kuna kipindi alikuwa akihitaji kuiuza baada ya wezi kumvamia na kumuibia vito vilivyofikia thamani ya Pauni 100,000.

MAISHA BINAFSI NA BATA

Ni shabiki mkubwa wa mitindo, lakini amekuwa pia na tabia ya unywaji wa pombe na Septemba, 2023, alifungiwa kuendesha gari baada ya kukutwa anaendesha huku amelewa, mbali ya kufungiwa alipigwa faini ya Pauni 57,000 kutokana na kosa hilo.

Kwa sasa mahusiano yake hajayaweka wazi lakini ana mtoto mmoja wa kike aliyezaa na mchumba wake wa zamani Rebecca Halliday.