Leroy Sane atemwa kikosi cha Ujerumani

Mchezaji wa Bayern Munich na timu ya Taifa ya Ujerumani Leroy Sane atakosa mechi ya ufunguzi ya Kombe la Dunia la Ujerumani dhidi ya Japan kutokana na jeraha la goti ambalo amelipata.

Shirikisho la Soka la Ujerumani (DFB) limethibitisha kuwa winga huyo wa Bayern Munich hakuwepo kwenye mazoezi ya mwisho ya Ujerumani ambayo watakuwa wakijiandaa na mechi ya Kundi E kwenye Uwanja wa Kimataifa wa Khalifa hapo kesho.

Taarifa ya DFB ilisema,

“Timu ya Taifa ya Ujerumani lazima imkose Leroy Sane katika mchezo wao wa ufunguzi wa Kombe la Dunia dhidi ya Japan siku ya Jumatano. Leroy ambaye ana miaka 26 hatakuwepo kutokana na tatizo la goti.”

Huku wachezaji 25 ambao walisalia kwenye kikosi cha Ujerumani cha Kombe la Dunia wakishiriki katika mazoezi ya mwisho huko Al-Shamal. Pia wametangaza kuwa baada ya chakula cha mchana, kikosi hicho cha mabingwa mara nne wa Dunia kitaelekea katika mji mkuu wa Qatar, Doha.

Ingawa kumpoteza Sane, ambaye amefunga mara 11 katika mechi 45 alizoichezea nchi yake, ni wazi kuwa ni pigo huku kocha mkuu Hansi Flick akiwa na wachezaji wengi katika nafasi ya ushambuliaji Serge Gnabry, Julian Brandt, Mario Gotze, Kai Havertz na Jamal Musiala.