Kyombo aanza kutupia, Mpole aongeza presha Ligi Kuu

Achana na matokeo ya sare ya bao 1-1 ishu ni kwa nyota Habibu Kyombo (Mbeya Kwanza) na George Mpole wa Geita Gold katika vita ya ufungaji mabao.

Katika mchezo huo uliopigwa leo Jumatatu saa 8 mchana katika uwanja wa Nyankumbu mjini humo ulimalizika kwa sare ya bao 1-1.

Timu hizo zilikutana ikiwa kila upande unakumbuka ushindi katika mechi iliyopita, ambapo Mbeya Kwanza waliinyoosha bao 1-0 Kagera Sugar, huku Geita Gold ikiizabua Tanzania Prisons bao 1-0 na kufanya mechi hiyo kuwa ya kusaka heshima lakini hadi dakika 90 hakuna aliyeweza kuondoka na alama tatu.

Mbali na matokeo hayo, kazi ilikuwa kwa Straika wa Mbeya Kwanza, Habibu Kyombo ambaye amesajiliwa hivi karibuni katika dirisha dogo ambaye ameanza kasi yake ya kucheka na nyavu akifungua akaunti ya mabao.

Mchezo huo ambao ulikuwa wa pili kwake tangu atue kikosini humo bao lake la penalti lilitosha kuipa alama moja na kuwa bao lake la kwanza.

Naye nyota wa Geita Gold, George Mpole ameendelea kuongeza presha kwenye vita ya ufungaji mabao baada ya kufikisha mabao matano sawa na Jeremia Juma (Prisons) na Vitalis Mayanga wa Polisi Tanzania.

Kwa matokeo hayo yanaifanya Mbeya Kwanza chini ya benchi jipya la ufundi likiongozwa na Maka Mwalwisi kuvuna alama nne ugenini kwenye mechi mbili na kufikisha pointi 11 huku Geita Gold wakifikisha alama 12.