Kwa heri soka papatu papatu, soka biriani linarudi leo Simba - Ahmed Ally

Meneja Habari na Mawasiliano wa Klabu ya Simba, Ahmed Ally amesema kuwa mchezo wa leo wa Ligi Kuu ya NBC dhidi ya Namungo utakuwa ni mchezo wa ushindi na burudani.

Hii ni baada ya Simba kutoka kupokea kipigo cha bao 5-1 kutoka kwa watani zao Yanga na kusababisha kocha wao, Robertinho kutimuliwa kutokana na matokeo hayo mabaya.

"Utaiona Simba ya tofauti sana dhidi ya Namungo, ile ya 'tunashinda ila hatuna furaha' imeshafutika, namna mazoezi wanavyofanya wachezaji wetu ni ya nguvu, kasi na ubora wa hali ya juu, ni mabadiliko makubwa tumeanza kuyaona ndani ya muda mfupi, watu watafurahia boli.

"Selemani Matola ni zaidi ya Kocha Mkuu, hata Namungo wenyewe wanatamani kuwa na Matola. Hizi mechi anaweza kuzicheza bila mashaka, watu wanamchukulia poa kwa sababu anatoka Kigoma. Ni kocha mwenye maarifa makubwa sana ya soka la dunia, kesho ni boli na burudani," amesema Ahmed Ally.