Kocha wa kwanza Mwanamke katika Soka la Wanaume

Klabu ya Forest Green ya nchini Uingereza jana ilimtangaza Hannah Dingley kuwa Kocha wake Mkuu wa muda mfupi, na kumfanya kuwa Mwanamke wa kwanza kushika nafasi hiyo katika soka la kitaaluma nchini humo.

Dingley anachukua nafasi ya kocha anayeondoka Duncan Ferguson ambaye alijiunga na klabu hiyo Januari mwaka huu hata hivyo alishindwa kuizuia timu kushushwa daraja kwenda League 2 ambalo ndilo daraja la chini kabisa katika soka ya kitaaluma ya nchini Uingereza.

” Ninafuraha kubwa kupata nafasi hii ya kuiongoza klabu” alisema Dingley ambaye alijiunga na Forest Green miaka 4 iliyopita.

”Haikuwa kazi ngumu kumchagua Hannah, amefanya kazi nzuri sana kuongoza Academy na maadili yake yanaendana na klabu” alisema Dale Vince ambaye ni mwenyekiti wa klabu huyo.

Hannah ataanza kuitumikia nafasi hiyo leo kwenye mechi ya kirafiki dhidi ya Melksham Town.