Kocha Namungo FC afurahia mabadiliko ya ratiba Ligi Kuu

Kocha Mkuu wa Namungo FC Denis Kitambi amesema kikosi chake kipo tayari kuikabili Simba SC katika mchezo wa Ligi Kuu Tanzania Bara utakaopigwa Mei 3, huku akisisitiza ratiba imeongeza morali kikosini.

Mchezo wa Namungo na Simba SC awali ulipangwa kuchezwa Mei 14, lakini umerudishwa nyuma hadi Jumatano mwezi ujao baada ya wageni wao kumaliza ratiba yao ya michezo ya kimataifa.

Kitambi amesema timu ilikuwa na mapumziko ya sikukuu za Idd na Jumatatu walirudi kambini na wanaendelea na mazoezi tayari kumkabili mnyama.

“Tulikuwa na ratiba ya kukaa nje ya uwanja wa mashindano kwa zaidi ya mwezi kabla ya mchezo huo na Simba SC tulitakiwa kucheza dhidi ya Azam FC Mei 15 lakini sasa tutaanza na Simba SC.”

“Mchezo wetu na Simba SC Jumatano ijayo (Mei 3) umeongeza hali ya ushindani mazoezini baada ya wachezaji kukosa mechi kwa muda mrefu tangu tulipocheza mara ya mwisho na Aprili 9 mwaka huu dhidi ya Mbeya City na kuibuka na ushindi wa mabao 2-1,” amesema kocha huyo ambaye aliwahi kufanya kazi Simba SC kama kocha msaidizi

Kitambi amesema kuelekea mchezo huo, wamejiandaa vizuri na wataingia kwa kuwaheshimu wapinzani wao Simba SC kutokana na kuwa moja ya timu ambazo zimetoka kucheza mashindano makubwa tofauti na wao ambao walikuwa wanafanya maandalizi bila ya mechi.

“Kuna tofauti kubwa ya utimamu wa miili kati yetu na wapinzani wetu, lakini hilo haliondoi mchezo huo kuwa muhimu kwetu kupata matokeo ili kujitengenezea mazingira mazuri kwenye msimamo wa ligi,” amesema Kitambi

Simba SC inashika nafasi ya pili katika msimamo wa Ligi Kuu Tanzania Bara ikiwa na alama 63 baada ya kucheza michezo 26, huku Namungo FC ikiwa nafasi ya sita ikiwa na alama 35 ikicheza michezo 26.