Kocha Mkuu wa Namungo FC, Denis Kitambi.
Benchi la Ufundi la Klabu ya Namungo FC limesema linatarajia kuongeza wachezaji wanne kwa ajili ya kuiongezea nguvu timu hiyo kuelekea msimu ujao wa Ligi Kuu Tanzania Bara unaotarajiwa kuanza Agosti mwaka huu.
Kocha Mkuu wa Namungo FC, Denis Kitambi, amesema ataongeza washambuliaji watatu pamoja na beki mmoja.
“Nafasi hizo ndizo ambazo zilikuwa na mapungufu msimu uliopita, malengo yangu ni kuwa na kikosi bora,” amesema Kitambi.
Kocha huyo amesema tayari wameanza kufanya mazungumzo na baadhi ya wachezaji ambao wanawahitaji na kwamba muda wowote kuanzia sasa watamalizana nao.
Amesema wachezaji ambao atawasajili wanatoka kwenye klabu kubwa hapa nchini na baadhi nje ya nchi.
“Malengo yangu ni kufanya vema msimu ujao na kushika nafasi ya juu kwenye msimamo wa Ligi Kuu Tanzania Bara, ninapaswa kufanya maandalizi mapema,” amesema.
Akizungumzia msimu uliopita amesema ulikuwa mgumu na wenye upinzani mkubwa kwani kila timu ilikuwa inacheza kwa ushindani jambo ambalo linawafanya wazidi kujizatiti zaidi kuelekea msimu ujao wa 2023/24.