Marwa Chamberi.
Kocha Msaidizi wa Kagera Sugar, Marwa Chamberi amesema kuwa mchezo wa kesho wa ligi dhidi ya mabingwa watetezi, Yanga utakuwa mgumu kutokana na kwamba waliwazuia kupata ushindi katika duru ya kwanza kule Kaitaba Stadium.
Chamberi amesema hayo leo wakati akizungumza na wanahabari kuelekea mchezo huo utakaopigwa kesho katika Dimba la Azam Complex, Chamazi.
“Tumekuja Dar kupambana na kesho tutapambana na Yanga. Yanga ni timu nzuri, ni timu bora kwa sasa Afrika. Ukitazama timu bora Afrika na Yanga lazima uitaje, katika nchi ndiyo timu bora kwa wakati huu kwa hiyo tunakwenda kucheza na timu kubwa.
“Kutakuwa na changamoto nyingi kwa upande wetu kwa sababu ya viwango na ubora wa Yanga hauendani na wachezaji wetu. Tuna kazi kubwa ya kufanya kuhakikisha tunapambana na Yanga.
“Tuliwazuia mechi ya kwanza tukatoa sare lakini kutokana na hilo ndiyo maana mchezo wetu wa kesho utakuwa mgumu sana, watakuja wamejiandaa mara mbili zaidi ya walivyojiandaa kwenye mechi ya kwanza. Wana morali ya kutoka kushinda, kucheza kwenye CAFCL kwa hiyo wana confidence kubwa,” amesema Kocha Chamberi.