Kocha JKT: Tuliingia kwenye mfumo wa Yanga

Kocha Mkuu wa Klabu ya JKT Tanzania, Malale Hamsini bila kusita wala kupepeza mdomo amesema wazi kuwa waliingia kwenye mfumo wa Yanga na kocha Miguel Gamondi na ndiyo maana walikuwa chuma 5-0.

Malale amesema, mwanzo wa mchezo walijaribu kuwatega Yanga kwenye mchezo wa juzi Jumanne pale Azam Complex Chamazi, lakini kumbe mtego huo ulikuwa kama wao kujiingiza kwenye mfumo.

Akizungumza kwa hisia kali kocha Malale ambaye msimu uliopita alikuwa anainoa Polisi Tanzania alisema: “Kimsingi tuliingia kwenye mtego wa Yanga na tukafungwa goli tano.

“Walikuwa bora sana wenzetu kwenye dakika zote za mchezo ule, kimsingi tulifanya makosa na tukaadhibiwa magoli mengi na tutajifunza kupitia kilichotokea.”

Malale aliongeza kuwa, alifanya makosa pia kwenye kufanya mabadiliko aliyoyafanya kipindi cha pili, wakiingia Hamisi Ndemla, Dany Lyanga na Ismail Aziz Kader ambao walishindwa kubadilisha hali ya mambo.