Kocha Azam alia na ratiba Bara

Baada ya kichapo cha mabao 2-1 dhidi ya Dodoma Jiji, Kocha Mkuu wa Azam FC, Dani Cadena amesema siku 12 kabla ya kuikabili Simba zitakuwa chachu kwake kusawazisha makosa ya timu hiyo, huku akikiri kuwa pia ni athari kwa timu kwani ni nyingi.

Azam FC ilikubali kichapo hiyo Februari 4 ugenini dhidi ya Dodoma Jiji na itakuwa na siku 12 bila mchezo wowote wa ligi hadi Februari 21 itakapovaana na Simba ugenini, ingawa pia kocha huyo ana wasiwasi kuwa mechi hiyo huenda haitakuwepo.

Akizungumza Cadena ambaye tangu ameanza kuisimamia timu hiyo hajapata matokeo mazuri kwenye mechi mbili mfululizo akianza na Singida Big Stars na kukubali kipigo cha bao 1-0 na dhidi ya Dodoma Jiji alisema ni muda wake sasa kufanyia kazi makosa aliyoyaona huku akisisitiza kuwa atatafuta mechi ya kirafiki ili kuwaweka kwenye hali ya utimamu mzuri wachezaji wake.

“Matokeo mabaya mfululizo haina maana wachezaji hawana uwezo ni sehemu ya matokeo nitatumia muda mrefu ulio mbele yangu kutokana na ratiba ilivyopangwa kuhakikisha nasawazisha makosa niliyoyaona ili timu irudi kwenye ubora wake,” alisema Cadena.