Kocha Ajax aja juu, adai pesa imeshinikiza uhamisho wa Staa wake

Kocha wa Ajax, Alfred Schreuder anaamini Manchester United ilitoa mkwanja mrefu iliyogharimu Pauni 100 milioni kwaajili ya fowadi Antony, 22.

Man United ilitoa kitita cha Pauni 85.5 milioni kwanza kabla ya kumalizia nyingine iliyobaki lakini  kocha huyo akasisitiza Antony hana thamani ya pesa hiyo.

Schreuder, alichukizwa namna uhamisho huo ulivyofanyika na kukashifu tabia ya winga huyo kushinikiza kujiunga na Man United.

Schreuder alizungumza kupitia kituo cha televisheni cha Ziggo Sport;

“Gharama yake ni kubwa sana, siku hizi kiwango cha pesa ya usajili ni kubwa sana, Je Antony ana thamani ya mkwanja huo? Hapana lakini pesa imetolewa”

Kocha alipoulizwa endapo Antony atalimwa faini baada ya kugoma mazoezi akajibu;

“Sidhani kama ni jambo zuri, inasangaza mambo kama haya yanayotokea Ajax, niliongea na Antony kuhusu hili, alikasirika na nimemuelewa, lakini kama mchezaji unatakiwa uonyeshe heshima,”

Ndani ya misimu miwili Ajax, Antony amecheza jumla ya mechi 82 katika mashindano yote na kufunga mabao 24.