Klopp amtisha Alonso kutua Liverpool

Klabu ya Bayern Munich ya Ujerumani, imeanzisha mazungumzo na kocha mkuu wa Bayer Leverkusen, Xabi Alonso kuhusu kuchukua nafasi ya Thomas Tuchel ambaye atamaliza kibarua chake ndani ya Bayern msimu wa joto kulingana na taarifa zilizoripotiwa na vyombo vya habari hivi karibuni.

Alonso, ambaye pia ametajwa kujiunga na Liverpool, ndiye kocha anaye pendekezwa zaidi na Bayern na inafahamika kuwa Alonso alishawawashia taa ya kijani Bayern wakati wa mazungumzo ya awali.

Mhispania huyo mwenye umri wa miaka 42 ataigharimu Bayern kati ya £12.8m-£21.3m zaidi ya Tsh. bilioni 68.7 ili kutua ndani ya klabu hiyo kwani kipengele maalum cha kuondoka Leverkusen kilichopo katika mkataba wake kitagharimu takribani £12.8m zaidi ya Tsh. bilioni 41.

Sky Sports Ujerumani anaripoti kwamba Bayern wana matumaini makubwa kwamba Alonso atahamia Munich. “Taarifa zilizopo ni kwamba Alonso atakwenda Bayern na sio Liverpool. Alonso anasema kwamba Liverpool na urithi wa Jurgenn Klopp ni namba ngumu, unaweza kupoteza zaidi ya kushinda.”

Bayern ilithibitisha mnamo Februari kuwa wataachana na Tuchel mwishoni mwa msimu, wakati huo huo, Liverpool wanamtafuta mrithi wa Klopp.