Kituo cha mazoezi cha Argentina chapewa jina la Messi

Nahodha wa timu ya Taifa ya Argentina Lionel Messi, amekishukuru chama cha soka cha Argentina baada ya kubadili jina la kituo cha kufanyia mazoezi cha timu ya Taifa na kukipa jina lake.

Nyota huyo alipewa taarifa kuhusu heshima hii Jumamosi iliyopita na alifurahia sana. Huku akilengwa na machozi Messi alisema; ”Hii ni moja ya utambulisho mzuri zaidi niliowahi kupewa. Ni heshima kubwa, asanteni sana”.

Timu ya Taifa ya Argentina ilipokelewa kishujaa katika jiji la Buenos Aires wakati wa mechi ya kirafiki dhidi ya Panama Alhamisi iliyopita.

Hii ilikuwa ni mechi yao ya kwanza ya Kimataifa tangu kushinda Kombe la Dunia miezi mitatu iliyopita. Vilevile ilikuwa mara ya kwanza kwa Messi kucheza nchini Argentina tangu ushindi waliouchukua nchini Qatar.