Ismail Aden Rage.
Mwenyekiti wa zamani wa Klabu ya Simba, Ismail Aden Rage amesema kuwa watani zao, Klabu ya Yanga wanapaswa kupongezwa kutokana na soka safi wanalocheza hivi sasa na kupata matokeo mazuri kwenye michuano ya Kimataifa.
Rage amesema hayo kufuatia matokeo mazuri waliyopata Yanga juzi, Februari 24, 2024 kwa kuifunga CR Belouizdad bao 4-0 na kutinga hatua ya robo fainali ya CAFCL wakiwa na mchezo mmoja mkononi, na kuvunja rekodi yao ya miaka zaidi ya 52 iliyopita kufika hatua hiyo.
“Lazima tukiri kwamba mchezo uliochezwa juzi na Yanga naweza kusema kuwa tangu wacheze Ligi ya Mabingwa na Ligi ya Tanzania Bara, Yanga hawajawahi kucheza mpira mkubwa kama huo.
“Juzi wameonesha juhudi, maarifa, ball possession na jinsi ya kufunga mabao ambayo ni ‘impossible’. Yanga wanastahili sifa kubwa, na kwa uwezo wa Mwenyezi Mungu tuwaombee wafike mbali katika mashindano haya.
“Lazima tuuseme ukweli, timu ya Yanga kwa sasa hivi iko vizuri sana, na ninawaomba waendelee kushikamana na Watanzania tuwaombee,” amesema mzee Rage.